شر البلية ما يضحك (1): إيه وله مجتمعين خوش جمعه و ..:

 

كتابات - حسن الأنباري

خادم علوم آل محمد عليهم السلام

 

طبيت لــ كتابات وشفت بيه طيبين وكاتبين بيهه هواية كتابات .

 وتعجبت أمكيف ،  وفرحت ، وأتذيت وأقبلت الأذيه على مضض .

يعني مثل ما : راح صدام ، وارتاحوا أهلنا ، وأچت أمريكه .

 وشفتكم بخوش لمه ملتمين ، وحبيت أشارك وياكم سوالفكم ، وأگول :

السلام عليكم ورحمة الله وبركاته :

 إيه وله مجتمعين وبخوش لمه كأنه العراق وبكل تناقضاته وحنانه إللي جمع بيه أهلنه المظلومين ـ وإلي هنا بهل الصفحة چنهم كلهم گاعدين يسلفون أبيناتهم :

 

شفت من بينكم جماعة ـ بلگت كلكم ـ فرحانين والگاع ما أشيلكم وكأنه الواحد منكم أنطوه الدنيه كله وأنه مثلكم ،  ولو بعده گاعد أبمكانه بديرة الغربه ، وكدام كومبيوتر بغرفه .

 

وشفت جماعة بيكم يحبون يثورون بالعجل ويگلون راح ظالم وأچه مثله.

 

وشفت جماعة أيگولون موگته خلينه نشوف أهلنه وأنلملم جراحنه حتى لو أمريكه تبوگنه .

 

وبعضهم يرفض ويگول أمريكه حبابه ما تبوگ ، موزين خلصتنه من صدام شوفوا المقابر الجماعية لحبايبنه ، اللي ما نبدل أظفر من أضافرهم  بالدنيه  كله، شوف اشسو بيهم هدام وربعه الميتيه وما چانو بعثيه بعثهم الله للنار ، موزين خلصونه من هل الظلمه .

 

وشفت بعضهم أيده ويگول يله خلينه بحال مغمضين عين ومفتحين عين ، أنفتح عين على مصيرنه بعد الفرحه ، وشلون نللم جروحنه ونسوي حكومتنه ونتعاون وياهم ، ولما وصلنه لهل الحاله ، نفتح العين المغمضه ، و نكلهم يله بس عاد ، كافي أخذتوا حسابكم وثمن توخير صدام من على ركابنه ، أطلوع مشكورين حته تبگه العلاقه بينه طيبه ، وبعضهم عنده جرأه ويكول وو إذا ما أطلعون تره تدرون ، وألله يستر ويسعادنه ذاك الوگت.

 

وبعض يگول يا حگ ألهم همه جابوه همه ودوه ، و چماله آذونه ، يله إذا تابوا من المظلم خليهم يخلونه بحالنه ، أحنه نضمد جروحنه شبينه .

ويجاوبه أخر يگله ما نگدر ترانه القوي ياكل الضعيف وعدنه شريعة الغاب ويجي مثل هدام تره ، ويجاوبه يكله مات هدام وأجو أحرار ، ومن هل الحچي هواي حچي ، وحمل جمال ـ والحبل على الجرار.

 

وشفت جماعة مو يم الثورة ولا الحرب ، ولا ويه أمريكه وسوالفه ، ولا يم المصايب الي حلت بالأهل ، عندهم هموم أخرى  حزبية ودينيه ولا دينية ، وبعضهم عندهم خلافات عائلية ، وبعضهم عندهم مناقشات عقائدية وفكريه ، بلگت فرعية وجزئيه ، ومخبصوين بيه ، ويگول بعضهم هاي هيه هم من ذيج ، وهنا بيت القصيد، شعجب بائهم اتجر أو بائنه متجر ، إذا صفينه هاي تصفه ذيج ، وتروح أميركه مثل ما راح هدام ، لو خليهم لمن نخلص هل هَم ونصفيه ، وهمه ذاك الوگت هم يخلصون ويخلص العراق وأهلنه ، وهو باقي بهل السوالف من غير حاصل ومفيد ولا ينطي حل ونتيجه .

 وبعضهم والعياذ بالله مغرض ويريد يصفي حساب ويه الي مثله ومثل حاله وهذا موزين .

 

 وبعضهم لا وله طيب يريد يوصل لحل طيب مثله ويخلص من الي جان ، ويريد يجتمع على الحق ويعرف نصيبه ونصيب غيره ، ويشوف غيره چان مثل نصيبه غشوهم الميتيه ـ لا بعثهم الله إلى إلى النار ـ ومن جابهم واسلطوهم عليهم ، وخلوهم واحد يدگ بالاخ وصعدوا على جتافهم وضلوا يراوهم الضيم والضليم ، لمن هسه الله خلصهم منهم ولو بيد غيرهم ، يعني شويه يريد يللم الجمع ويضمد اجراحه وجراح الطيبين ، وينهض بهمه چبيرة  يبني من غير خراب لا لنفسه ولا لغيره ولا لوطنه ولا لأهله ، وهذا الله يبارك بيه .

 

وشفت جماعه يباركون لبعض ويراونه أشياء من الواقع هناك يم أهلنه ، وصور حلوه وتعاليق لطيفه ، ويراوينه شويه من ذاك التراب الطيب والهوى أللي يشتاقه كلمن عنده هوه و گلب طيب للذكريات ، بارك الله أبجهودهم وزاد من أمثالهم .

 

وشفت جماعه يحللون الأوضاع ويكتبون عن كل شي عن فدائيين هدام وعن مجابهين من أيران منافقين ومخلصين ، وعن ناس خدموا هدام وصاروا بالحكم من جديد ، وعن ناس بالغرب يدعهم الغرب وأجو مسوين حزب وشلون حزب ، وعن ناس ألهم أصل وفصل وبعض بساطه و قاوموا هدام ، وبعضهم هدام جابهم وخرهم ، بلگت همه جابوه وخروه ، وبعضهم يعرف نفسه وبعضهم يعرف حزبه ، وبعضهم ينظر ليومه ويفتخر بأمسه وبعضهم وبعضهم.

 وبعضهم يفلسف الوضع و گوه تحصل على نتيجه منه ومتدري يشكول.

وبعضهم حجيه المسفط حلو مثل نفسه ، وبعضهم حجاياته كبار ، وبعضهم يذكرنه بحقائق مره وحلوه ، وبعضهم يدعوا الآخرين لدعمه ويجرهم لفكره ، وبعضهم يسخر من الوضع وأهله وشلون صار مبكي مفرح ، وبعضهم يگرض ويگرص بالأخرين بحجيه ويآذي بدون فايده الله ياذيه ـ هذا موزين ـ بلگت يرمي بسهم معادي ومدسوس .

 وبعضهم مخلصين يريد الخير للعراق وللعراقيين ويحاول يجمعهم بلمت شمل حلوه وعلى الخير وصفحه بيضه من جديد .

 مثل كتابات ، والصحف الكثيرة الأخرى ، ليعرف نبض العراقيين ويخطط شيسوي وياهم : ينصرهم ليجمعهم على  الوحدة والله ينصره ، وبعض ليخذلهم ـ وهو مأجور من غير مكان ـ الله يخذله ، وبعض يصطاد بالماء الصافي بعد ميعكره الله يعكره ويخلصنه منه ويبقي بس الطيبين والي يريدون الخير .

 

وعله كل حال مجتمعين بلمه خوش لمه والمعكر يبين بلحن القول ما تدخل أحچاياته الگلب ، ويبقى الكلام الطيب إلي الله هم يحبه ويرفعه ولمثل هذوا أگول الله ساعدكم ويشد بعزمكم للخير .

 

وأما البلية التضحك فهو شهادة كثير من الأعزة وسلب وطن وأهل وأرض من الأول والأخر ، وبعده ما تدري لوين توصل حتى صارت فوضه ، أو وصل كل واحد ال غرضه بالحق أو كان مظلوم بعده ، لأنه عرف شويه من مقدار الظلم إلي صار بيه فضلا عن الجان عليه ، وإن شاء الله يزول كله ، ولذا إن شاء الله نضحك أو نفرح أو ننسه ولو الثمن جان غالي ، ولو بضحكه يعصره ألم إلي چان وباگي منه شويه .

 

 ولمثل هل سبب وغيره گالو من زمان . و گلت هسه :

 

شر البلية ما يضحك :

 

فأما البلية : وأخاف يصير بيه شر فهو الاختلاف أبينه ، و چماله هناك أجنبي ويانه  ابفكره أو بعمله ، وماگو فرق جان من عدنه ومحسوب علينه لو لا مناك أجه .

 

 وأما ما يضحك ويفرح : هو ما أنشوفه عراقيين بساحة الحرية يعبرون عن رأيهم من غير غل إن شاء الله ، وأسأله أن يصفي بينهم ويجمعهم على الوحدة والخدمة ، للوطن السليب ، وللقلب الجريح ، ويجمعهم الله إن شاء الله مع الأهل في داخل الوطن ، ويدگون حنچ ويه الحبايب من غير أجانب بالفكر والذكر والعلم والعمل .

والسلام عليكم ورحمة الله وبركاته .